საიტი მუშაობს სატესტო რეჟიმში
Menu
საიტი მუშაობს სატესტო რეჟიმში
სასკოლო კვების საკითხის აქტუალიზებისა და საზოგადოების ცნობიერების ამაღლების მიზნით, განათლების კოალიციამ და ასოციაციამ „მშობლები განათლებისთვის“ 14 -19 მარტს, სასკოლო კვების საერთაშორისო დღეს, პირველად საქართველოში სასკოლო კვების კვირეული გამართეს.
სასკოლო კვების პრობლემას მრავალფეროვანი აქტივობებისგან შემდგარი კვირეული მიეძღვნა.
ფორუმზე განათლების კოალიციამ სოციალური ლაბორატორიების ანგარიში „სასკოლო კვების პროგრამის დანერგვის აქტუალობა და შესაძლებლობების ანალიზი’’ წარმოადგინა, ხოლო პანელური დისკუსიების ფორმატში გაიმართა მსჯელობა როგორც არსებული გამოწვევების, ისე მისი გადაჭრის ალტერნატიული გზების შესახებ. ფორუმის ფარგლებში, აუდიტორიას მიმართა სუზან მაიერმა, სასკოლო კვების საერთაშორისო კოალიციის მრჩეველმა და ისაუბრა როგორც სასკოლო კვების ქსელის მნიშვნელობაზე, ასევე საქართველოს გაწევრიანებისა და სახელმწიფოს მიერ ასაღები ვალდებულებების თაობაზე.
„უკვე წლებია, საგანმანათლებლო სისტემის განვითარების მიზნით, სწავლა-სწავლების მიმართულებით, მრავალნაირ პროგრამას ვახორციელებთ: ვცვლით კურიკულუმებს, ვამზადებთ მასწავლებლებს, ვცდილობთ შემოვიყვანოთ ახალი კადრები და ა.შ. თუმცა, სულ უფრო ვრწმუნდებით, რომ სწავლების ხარისხის გაუმჯობესებისთვის უმთავრესია ბავშვების კეთილდღეობაზე მეტად ვიზრუნოთ. ეს იმას ნიშნავს რომ მათ, მინიმუმ, არ უნდა სციოდეთ და არ უნდა შიოდეთ. ამის შემდეგ უკვე ემოციურად უსაფრთხოდ უნდა გრძნობდნენ თავს და ინფრასტრუქტურული გარემო, რომელიც სკოლაში ხვდებათ, კომფორტული იყოს. ეს მოთხოვნილებები უნდა დაკმაყოფილდეს, რათა ბავშვი მოტივირებული იყოს და სწავლებაში ჩაერთოს“, – აღნიშნა ირინა ხანთაძემ.
„ძალიან კარგი იქნებოდა სკოლაში ყოფილიყო ბუფეტი, სადაც საჭმელი მომზადებოდა და იქნებოდა უფასო, ან მინიმალური ღირებულების, რათა ყიდვა ყველას შესძლებოდა. ამ ღონისძიებაზე იმიტომ მოვედი რომ მინდა სკოლებში ყველასთვის ხელმისაწვდომი ჯანსაღი კვება იყოს. ვფიქრობ, რომ ამ ყველაფრის შემდეგ შეიძლება რაიმე შეიცვალოს. ამის დიდი იმედი მაქვს“,
"ძალიან მნიშვნელოვანია სახელმწიფო უზრუნველყოფდეს უფასო კვებას ყველა მოსწავლისათვის, არამარტო აკადემიური მიღწევების გაუმჯობესებისთვის, არამედ იმ სოციალური გამოწვევებისთვის რომელიც ქვეყანას აქვს"
კვირეულს ვიდეოგზავნილებით შემოუერთდნენ საზოგადოებისთვის ცნობილი სახეები.
კვირეულის ფარგლებში, 14-19 მარტს, სათემო და საგანმანათლებლო ორგანიზაციამ, მთელი საქართველოს მასშტაბით, სასკოლო კვების პროგრამის მხარდასაჭერად, სხვადასხვა თემატური ღონისძიებები გამართეს.
განათლების კოალიცია აწარმოებს სასკოლო კვების ადვოკატირების კამპანიას. პროექტი ხორციელდება USAID-ის სამოქალაქო საზოგადოების ჩართულობის პროგრამის მხარდაჭერით USAID Civil Society Engagement Program
© 2018 All rights reserved
